我罔講汝罔聽
http://gnudoyng.timluo.net
<p>nguāi muōng gōng nṳ̄ muōng tiăng, a blog in foochow romanized and more...</p>
gnudoyng
2009-01-07T14:01:35Z
-
我支持王千源
http://gnudoyng.timluo.net/post/35/228
<p>“愛國者” cī-bŏng 真真好戲演 mâ̤ 煞，做癲犬樣式， bá-láu lā̤ 紅目睭滿世 să-gău “藏獨分子”，話故未講兩句（犬囝本底就 mâ̤ 講話）就起骹動手，拍 mâ̤ 贏就 báh 喙 gâ 儂，cī 幾工， bô 起手 <a href="http://www.nytimes.com/2008/04/17/us/17student.html?pagewanted=2&_r=2&sq=Grace%20Wang&st=nyt&scp=1" target="_blank">gâ 王千源</a>了。Cī 隻王千源是乍廿歲其青島諸娘囝，găk 美國留學。伊透底就無支持過“藏獨”，亦無做什乇——無罵儂無拍儂無刣儂無搶火炬，蜀滴滴 ngài-代都無做，就是徛着兩爿示威者臺中講道理。按癲犬邏輯：底儂共汝講 băh-pé 道理？汝伓共儂家徛蜀堆 gâ 儂伓是？會使！儂家就 gâ 汝！Gâ 死着有！……癲犬 gâ 儂罔在伊去，俗語話講：“下渡尾迎神，好看在後（<em>Â-dô-muōi ngiàng-sìng, hō̤ káng câi hâiu</em>）”——我死都想 mâ̤ 遘，連 CCTV 縂款正式其官方媒體都會攖 lā̤ 跳出來號伊做“<a href="http://tkfiles.storage.live.com/y1pevIsLMx_e7GONqur45C5TLrwfcAgoQ2iZZm-M1B1OdIMUXftsxBDkoeDSNjpGUTMx5fz9Y2Qfi4" target="_blank">dék 驚儂留學生</a>”<em>（最醜陋留學生）</em>。王千源會生的 ngài？我 chuŏng 手摸自家面：鼻大牙 sè̤，可疑自家是伓是已經破相了……</p><p>哈哈，我講-pă ^^，其實我卜噯共癲犬講：我見覺王千源生的野好！伓啻生的俊，伊簡直就是我見過 dék 作佳其諸娘囝！！奚勢縂款講呢？因爲伊有膽大聲講出自家其想法，共大部分儂 mâ̤ 蜀樣其想法。噲就是儂其<a href="http://cdo.wikipedia.org/wiki/C%C3%AA%CC%A4%E1%B9%B3-i%C3%B9" target="_blank">自由</a>，dék 欽貴亦 dék 根本其自由，勇敢表達自家愛共恨其自由。試問蜀句，<strong><span style="color: #ff0000">天下人間故有什乇乇會比喝出儂家愛共恨其權利故重要？</span></strong>汝連愛恨都無敢表達，講什名國家主權？領土完整？犬吠（<em>Kēng bôi</em>）！！！<br /><br />我看癲犬演戯，mâ̤ 載講是好笑，會載講是悲哀，替我祖國悲哀。不過蜀想遘我祖國故有像王千源縂款其好囝伲，烏暗其天乞伊蜀粒星照真光，我仈傳，中國希望故 lā̤ 有。</p>
Politics
2008-04-22T01:55:59Z
gnudoyng
-
請填藏儂自由
http://gnudoyng.timluo.net/post/35/213
<blockquote><p><span style="color: #0000ff">我仈傳自由對 giĕng-dṳ̆k 儂其意義。儂其自由，是該當勢攖國家利益懸頂邊……</span></p></blockquote><p>Cī-bŏng diŏh <a href="http://cdo.wikipedia.org/wiki/S%C4%83%CC%A4-c%C3%A2ung" target="_blank">Să̤-câung</a> huák-sĕng gì dâi-gié, gāng-dĭk cêu sê 89 nièng Lĕ̤k-sé Sê̤ṳ-giông gì tṳ̀ng-sĭng siông-iēng. Dṳ̆ng-gê̤ṳng kĕk ū-lĭk ngâing áik giâ Să̤-câung hù-siông gì káung-ngiê. Gé̤ṳ bó̤-dô̤, ī-gĭng ô gūi-sĕk ciéh nè̤ng ké̤ṳk tài sī, báh-siông nè̤ng sêu siŏng. Hiêng-káik-sì, céng-hū ī-gĭng gâe̤ng Să̤-câung hŭng-sō̤ lâi ·gó̤, pái buô-dôi bā-siū, mâ̤ kīng gé-ciā iù-káh diē. Páh ché̤ṳng siăng, tiè-mà siăng, gáe̤-géu siăng; háik, gâng gâe̤ng mĕk-cāi... Cuòi cêu sê Să̤-câung, găk Dṳ̆ng-gê̤ṳng tūng-dê â-dā̤ cĭng-sĭk gì Să̤-câung...<br /><br />Ká̤-sié Să̤-câung-nè̤ng â̤ siōng giàng gáu gă̤-dŏng huāng-káung Dṳ̆ng-gê̤ṳng? (<span style="color: #c0c0c0">Gì-sĭk cuòi dŭ sê ĭng-ôi Dṳ̆ng-gê̤ṳng giĕ-nièng-màng buóh bâing Ó̤-ông, dăng cêu găk Să̤-câung gì sê-miêu diē-sié kŭi-diēng "ái-guók gáu-ṳ̆k", âing-cié hù-siông gì cŭng-gáu uăk-dông, gó-chṳ̄.</span>) Muōi siŏh huòi Să̤-câung huák-sĕng cūng-kuāng dâi-gié, Dṳ̆ng-gê̤ṳng diâng-diŏh â̤ lâi Dăk-lâi Lăk-mà. Nàng-gă guó-éu siōng lâ cêu â̤-báik cuòi sê iā-gōng lāu: Dăk-lâi Lăk-mà liù-uòng găk nguôi-guók, ĭng-ôi Dṳ̆ng-guók sĭng-ùng hŭng-sō̤, Să̤-câung nô̤i-buô cêng sâ̤ dâi-gié ĭ dŭ mâ̤ hiēu, dăng cuōng â̤ gâe̤ng ĭ "Dăk-lâi Lăk-mà Cĭk-tuàng" ô gáng-guó?<br /><br />Nguāi buōng-sĭng ng sê Câung-cŭk, nguāi táu-dā̤ muôi kó̤ guó Să̤-câung, dó̤i huāi-nē̤ iâ mò̤ sié-nó̤h éng-chiông. Dáng-sê, nguāi báik-duòng cê̤ṳ-iù dó̤i giĕng-dṳ̆k nè̤ng gì é-ngiê. Nè̤ng gì cê̤ṳ-iù, sê găi-dŏng-sié ĕng guók-gă lê-iéh gà̤-dēng-bĕng. Buáng sié-gī sèng nàng-gă dŏk kó̤ Câung-nè̤ng gì cê̤ṳ-iù, găi-dŏng dèng ké̤ṳk ĭ-gáuk-nè̤ng, cuòi cêu sê nguāi gì siōng-huák.<br /><br />Dṳ̆ng-guók ā, nguāi gì Cū-guók, cī bĭk chṳ̆ng-muāng cô̤i-kiĕng gì guók-gă. Nguāi â̤-sāi dò̤ sié-nó̤h lì cīng-géu nṳ̄? Nguāi tō̤ mâ̤ diŏh dák-áng. Cuō ā, Nṳ̄ buóh-ó̤i cuōng ăng-bà̤ nàng-gă Dṳ̆ng-huà Mìng-cŭk gì ê-lài nĭ? Găk cŭ-uái, hióng siông nguāi dék gièng-sĭng gì gì-dō̤.</p>
Politics
2008-03-19T18:23:19Z
gnudoyng
-
會仈反省其民族乍會得著神其拯救
http://gnudoyng.timluo.net/post/35/205
<blockquote><p><span style="color: #0000ff">儂真稠共歷史比喻做蜀面鏡，nâ 中國儂掏者鏡 ng 是卜照自家，反倒去照別儂……</span></p></blockquote><p>Nièng-nièng-màng gáu nièng-muōi hī dâung sì-găng, Dṳ̆ng-guók diâng-diŏh â̤ kŭi-diēng gé-niêng Nàng-gĭng Duâi-ngiŏk-sák (南京大虐殺) gì uăk-dông. Buōng-dā̤ gōng, gé-niêng mìng-cŭk căi-nâng éng-găi-sié sáung sê cĭng ô é-ngiê. Bók-guó cê̤ṳ sá̤ gáu duâi, găk nguāi éng-chiông diē-sié, nàng-gă gáu-kuŏ-cṳ̆, guōng-bó̤, diêng-sê dŭ sê găk lā̤ sŏng-duòng Nĭk-buōng-nè̤ng ô nuâi ngài-áuk, nâ huāng-sēng cê-gă mìng-cŭk cô̤i-kiĕng gì uâ siŏh guó dŭ ng gōng. Nè̤ng cĭng sèu gâe̤ng lĭk-sṳ̄ bī-ê̤ṳ có̤ siŏh miêng giáng, nâ Dṳ̆ng-guók-nè̤ng dò̤ ciā giáng ng sê buóh ciéu cê-gă, huāng dó̤ kó̤ ciéu bĕk-nè̤ng.<br /><br />Nguāi siŏng-séng, mâ̤ báik huāng-sēng cê-gă gì mìng-cŭk, â̤ īng-uōng sêu Siông-dá̤ gì có. Dṳ̆ng-guók gūi chiĕng nièng kŏ̤-ngiŏk cê̤ṳ-iù mò̤-miĕk ìng-séng gì lĭk-sṳ̄, ciáh sê gê̤ṳng-dô̤i ké̤ṳk bĕk guók chĭng-luŏh gì gŏng-buōng nguòng-ĭng. Siōng káng lâ, Ī-sáik-liĕk uòng-guók ké̤ṳk ê-băng-ìng miĕk-uòng, ĭ gì cṳ̄-mìng ké̤ṳk liù-huóng gáu sié-gái gáuk dó̤i, Iù-tái-nè̤ng sê cuông gé-niêng hī dâung pĭ-chāng lĭk-sṳ̄ ·gì nĭ? Nè̤ng táu-dā̤ dŭ mò̤ hièng-hâung ê-băng siù-dĭk, nêng-ùi ciā kū-nâng dŭ sê mìng-cŭk buōng-sĭng gì cô̤i-áuk sêu diŏh Siông-dá̤ sīng-puáng gì nguòng-gó, niông cê-gă lì sìng-liāng cuòng-buô cáik-êng.<br /><br />Mūi huòi káng giéng Iù-tái-nè̤ng găk Să̤-chiòng (西墙, Western Wall) sèng-dāu gì-dō̤, tiè-mà, huói-cô̤i gì sèng-âu, nguāi dŭ iā gāng-dông. Nṳ̄ téng ciā huŏng-miêng cêu â̤ káng dék chók nàng-gă Dṳ̆ng-guók-nè̤ng gâe̤ng ĭ-gáuk-nè̤ng gì chă-biék lāu. Mâ̤ báik gó diŏh dīng nuâi òng, nàng-gă Dṳ̆ng-guók-nè̤ng ciáh â̤ ŏ̤h Iù-tái-nè̤ng kó̤ huāng-sēng cê-gă. Ĭng-ôi nâ ô gáu hiā sèng-âu, nàng-gă ciáh â̤ dáik diŏh Sìng gì cīng-géu.</p>
Belief
2008-02-13T19:29:41Z
gnudoyng
-
是上帝創造世界，承認嚽野重要
http://gnudoyng.timluo.net/post/35/202
Châung-sié-gé diē-sié gé-cái, sié-gái sê iù siŏh ciéh Siông-dá̤ iâ nâ ô siŏh ciéh Siông-dá̤ sū châung-cô̤ gì. Siông-dá̤ gì châung-sié â̤ téng lâng huŏng-miêng lì suók-mìng.<br /><br />Tàu siŏh huŏng-miêng sê Siông-dá̤ châung-cô̤ gĭng-dáng-nĭk sié-găng sū-iū gì nó̤h. Nàng-gă mĕ̤k-ciŭ káng gì, ngê tiăng gì, pé bê gì, ché̤ṳ-siĕk siòng gì, puòi-hŭ gāng-gáuk gì, sĭng diē siōng gì... cuòng-buô dŭ sê Siông-dá̤ gì châung-cô̤-ŭk. Tiĕng-dê uâng-ŭk dŭ hŭk-cṳ̀ng Siông-dá̤ gì guòng-ŭi. Nè̤ng ng-tĕ̤ng géng-bái Siông-dá̤ gì châung-cô̤-ŭk, iâ ng-sāi giăng ĭ, ĭng-ôi ĭ dŭ sê Siông-dá̤ gì cáuk-pīng. Diŏh gé diâng: nâ ô Siông-dá̤ găi-dŏng sêu géng-bái.<br /><br />Lêng-nguôi siŏh huŏng-miêng sê Siông-dá̤ cô̤ nè̤ng, cuòi sê Siông-dá̤ châung-sié gì dīng-hŭng. Nè̤ng gì sĕng-miâng uòng-cuòng nguòng cê̤ṳ Siông-dá̤ gì ŏng-diēng, gó-chṳ̄ nè̤ng diŏh kiê-diē, diŏh géng-ói Siông-dá̤. Bók-guó diŏh â̤ gé, nè̤ng sê Siông-dá̤ mì-ék piâng cê-gă iông-sék sū châung-cô̤ gì nó̤h, ké̤ṳk Siông-dá̤ chă̤-kiēng lì guāng-lī sié-găng uâng-ŭk, gó-chṳ̄ nè̤ng iâ diŏh siŏng-séng diŏh kēng-diâng cê-gă gì cŏng-gói.
Belief
2008-02-02T00:40:22Z
gnudoyng
-
卜噯重新學德語了
http://gnudoyng.timluo.net/post/35/200
<p>Dâi-hŏk sì-dô̤i Dáik-ngṳ̄ sê nguāi sōng-siŭ gì dâ̤ nê nguôi-ngṳ̄. Hiā sèng-âu ŏ̤h Dáik-ngṳ̄ cêng ·gó̤ kṳ̀ng-gīng, dṳ̀ kī bàng-só gṳ̆ng sĭng-săng siông-dòng, cê-gă gó mā̤ iā sâ̤ cṳ̆ liêng-sĭk, nĭk-nĭk-cā kók hăk-hâu gì chéu-lìng diē duâi-siăng buôi cṳ̆, màng-buŏ nâ mò̤ nó̤h có̤ cêu káng Dáik-guók diêng-īng ŏ̤h tiăng-lĭk gâe̤ng kēu-ngṳ̄, cĭng-cĭng siŏh-dék-dék sì-găng dŭ ng lâung-hié. Haha, mò̤ piéng nṳ̄, có̤ hŏk-sĕng-gŏ̤ sèng-âu nguāi táu-dā̤ dŭ iā kīng tĕ̤k, sĭng-săng dŭ dék tiáng nguāi. Nguāi gé hēng diâng, dâi-sé gĭ-muăk Dáik-ngṳ̄ kō̤-cṳ̆, kō̤-guóng ciáh huák lŏ̤h lì mò̤ buáng dēng-cṳ̆ng, nguāi cêu chiàng lâi ·gó̤, giék-guō dáik 93 hông, cuòng hiê dâ̤ ék miàng; sĭng-săng bŏ̤ nguāi tĕ̤k Dáik-ngṳ̄ iā lê-hâi ·nĭ...</p><p><span style="color: #c0c0c0">大學時代德語是我選修其第二外語。嘻辰候學德語盡去勤謹，除起平素跟先生上堂，自家故買野侈書練習，日日早屈學校樹林底大聲背書，暝晡 nâ 無乇做就看德國電影學聽力共口語，真真蜀滴滴時間都伓浪費。哈哈，無騙汝，做學生哥辰候我透底都野肯讀，先生都啲疼我。我記很定，大四期末德語考書，考卷乍發落來無半點鐘，我就成唻去，結果得93分，全系第一名；先生褒我讀德語野利害呢……</span></p><p>Ài, huòi dŭ sê gô-dā̤-dā̤ gì dâi-gié lāu...<img src="http://gnudoyng.timluo.net/js/tinymce/plugins/emotions/images/smiley-embarassed.gif" border="0" alt="Embarassed" title="Embarassed" width="18" height="18" /> 06 nièng iĕk-tiĕng nguāi Dâi-hŏk bék-ngiĕk, gáu dāng Dáik-ngṳ̄ gì nó̤h gī-hù mò̤ dŭng guó. Nguāi gó háng cê-gă tàu-sìng mò̤ ngài, ī-sèng ŏ̤h gì nó̤h mò̤ ông-dà̤ éng-găi. Ék-dĭk gáu sèng siŏh nguŏk uàng cṳ̆-dáing, nguāi sùi-biêng gēng siŏh buōng Dáik-ngṳ̄ chŭ-gék siēu-suók dò̤ kī ·kó̤ tĕ̤k, muōng huāng gūi hiĕk -- Uák-hâ! Cī sâ̤ dăng-sṳ̀ dŭ mâ̤ gé lāu ·a??!! Nguāi dŏng-â cêu báik-duòng, nguāi tàu-nō̤ diē-sié gì Dáik-ngṳ̄ dĭ-sék dŭ giék tì-dṳ̆-măng ·gó̤ lāu.</p><p><span style="color: #c0c0c0">唉，噲都是舊底底其代計了……<img src="http://gnudoyng.timluo.net/js/tinymce/plugins/emotions/images/smiley-embarassed.gif" border="0" alt="Embarassed" title="Embarassed" width="18" height="18" />06年熱天我大學畢業，遘仱德語其乇幾乎無 dŭng 過。我故 háng 自家頭神無呆，以前學其乇無問題應該。一直遘前蜀月 uàng 書店，我隨便揀蜀本德語初級小説掏起去讀，罔反幾頁——哇哈！只侈單詞都 mâ̤ 記了啊？？！！我當下就仈傳，我頭腦底勢其德語知識都結蜘蛛鞔去了。</span></p><p>Tó̤i-huói mò̤-nó̤h-sāi. Nguāi duōng chuó âu cêu gâe̤ng nguāi ī-sèng Dáik-ngṳ̄ gáu-cài gâe̤ng bék-gé cuòng-buô huăng chók lì lôi hō̤, giók-é dṳ̀ng-sĭng kăi-sṳ̄ ŏ̤h. Hiêng-câi nĭk-nĭk dṳ̆ng-ngū dò̤ buáng dēng-cṳ̆ng tĕ̤k Dáik-ngṳ̄ siēu-suók, màng-buŏ buôi dăng-sṳ̀, ŭng ngṳ̄-huák. Lâng lā̤-buái muôi gáu, nguāi giéng-gáe̤k cê-gă gì Dáik-ngṳ̄ gé-é bô mâing-mâing chĭng-chāng ·gó̤.<img src="http://gnudoyng.timluo.net/js/tinymce/plugins/emotions/images/smiley-laughing.gif" border="0" alt="Laughing" title="Laughing" width="18" height="18" /></p><p><span style="color: #c0c0c0">退悔無乇使。我轉厝後就共我以前德語教材共筆記全部翻出來類好，決意重新開始學。現在日日中午掏半點鐘讀德語小説，暝晡背單詞，溫語法。兩禮拜未遘，我見覺自家其德語記憶仅慢慢清醒去。<img src="http://gnudoyng.timluo.net/js/tinymce/plugins/emotions/images/smiley-laughing.gif" border="0" alt="Laughing" title="Laughing" width="18" height="18" /></span></p><p>Sèu-sèu tiăng nè̤ng gōng, Ĭng-ngṳ̄ sê sié-gái ngṳ̄-ngiòng, nàng-gă ŏ̤h Ĭng-ngṳ̄ cêu ô gáu lāu, nâ nguāi dó̤i ciā káng-huák ô é-giéng: <strong>Muōi siŏh cṳ̄ng ngṳ̄-ngiòng, dŭ sê siŏh cṳ̄ng gì-dĕk gì ùng-huá mì-sāng, dŭ sê ìng-lôi káng sié-gái gì siŏh cṳ̄ng huŏng-sék.</strong> Gó-chṳ̄ dŏ̤ ŏ̤h siŏh cṳ̄ng ngṳ̄-ngiòng cuŏk-dó̤i â̤ iéh nṳ̄. Sié-nó̤h? Siông-băng kák mòng?? Mò̤ èng ŏ̤h dâ̤ nê nguôi-ngṳ̄??? Cuòi dŭ sê nṳ̄ diâng-tè̤ng, cê-gă piéng cê-gă!</p><p><span style="color: #c0c0c0">稠稠聽儂講，英語是世界語言，儂家學英語就有夠了，nâ 我對啫看法有意見：<strong>每蜀種語言，都是蜀種奇特其文化遺產，都是人類看世界其蜀種方式。</strong>故此多學蜀種語言絕對會益汝。什乇？上班 kák 忙？？無閒學第二外語？？？嚽都是汝定蟲，自家騙自家！</span></p><p>Sié-gái cī-māng sâ̤ ngṳ̄-ngiòng: Dáik-ngṳ̄, Huák-ngṳ̄, Ngò̤-ngṳ̄, Să̤-băng-ngà-ngṳ̄, Nĭk-ngṳ̄... Dó̤-dā̤ sōng dĭ siŏh cṳ̄ng ciáh hō̤ nĭ? Nâ gái ké̤ṳk nguāi siŏh huòi dṳ̀ng-sĭng sōng-dĕk gì gĭ-huôi, nguāi gó â̤ sōng Dáik-ngṳ̄. Dáik-guók sê hiêng-dô̤i diék-hŏk gì ièu-lài, cuòi tiék-ngâing gâe̤ng Dáik-guók-nè̤ng mìng-cŭk ngṳ̄-ngiòng gì ngièng-gīng, mī-lâ̤, chṳ̆ng-muāng dé-hiê ô siŏng-găng.</p><p><span style="color: #c0c0c0">世界只蠻侈語言：德語、法語、俄語、西班牙語、日語……到底選底蜀種乍好呢？Nâ 介乞我蜀回重新選擇其機會，我故會選德語。德國是現代哲學其搖箂，嚽鉄硬共德國儂民族語言其嚴謹、美麗、充滿智慧有相干。</span></p><p>Mò̤ dâng. Dāng nguāi dŏng-cĭng ó̤i dṳ̀ng-sĭng ŏ̤h Dáik-ngṳ̄ lāu. Nguāi buóh ó̤i duâi-siăng gáe̤ chók siăng: "<span style="color: #ff0000"><strong>Ich liebe Deutsch!</strong></span>"</p><p><span style="color: #c0c0c0">無 dâng。仱我當真噯重新學德語了。我卜噯大聲告出聲：“</span><span style="color: #c0c0c0"><span style="color: #ff99cc"><strong>Ich liebe Deutsch！</strong></span>”</span></p>
Life
2008-01-24T18:19:41Z
gnudoyng
-
關於母語文學底勢使詞其蜀批想法
http://gnudoyng.timluo.net/post/35/199
<p>Sèng gūi nĭk siŏh ciéh Hók-chiăng-diê gâe̤ng nguāi gōng, <a href="http://www.china-pub.com/computers/common/info.asp?id=541839" target="_blank">Mìng-dŭ Biék-gé</a> (閩都別記) gŏng-buōng cêu ng-sê Hók-ciŭ-uâ ùng-hŏk. Huāng lì huāng kó̤, ĭ gāng-gáuk guòng cṳ̆ dŭ sê gū-diēng Băh-uâ-ùng, nâ Bàng-uâ lièng ōng dŭ mò̤. Nguāi cêu muóng ĭ: "Nṳ̄ ô mò̤ tiăng guó mìng-kiŏk hĕ̤k-ciā sê bìng-uâ? Ô mò̤ giéng-gáe̤k diē-sié gì ngṳ̄-ngiòng gâe̤ng nàng-gă bàng-só-siòng gōng gì uâ chă iā huông?" Ĭ éng nguāi, táu-dā̤ mò̤ tiăng guó.</p><p>Gōng sĭk-uâ, nguāi cê-gă iâ sê diōng-duâi ī-hâiu ciáh kăi-sṳ̄ ŏ̤h tiăng mìng-kiŏk gâe̤ng bìng-uâ. Sèng bŏng nguāi găk lā̤ káng Hók-ciŭ sĭng kiák gì bìng-uâ dông-mâng <a href="http://comic.qq.com/a/20071030/000029.htm" target="_blank">Găng Guók-bō</a>̤ (甘國寶), cêu huák-hiêng diē-sié gì ô sâ̤ cê-sṳ̀ dŭ sê téng Guăng-uâ cióh diē gì. Pī-ṳ̀-gōng, "three days later", bàng-só nàng-gă dŭ sê gōng "săng <strong>nĭk</strong> cĭ hâiu" (日) hĕ̤k "săng <strong>gĕ̤ng</strong> cĭ hâiu" (工), bìng-uâ sĭng-săng â̤ gōng "săng <strong>tiĕng</strong> cĭ hâiu" (天); "suddenly", Hók-ciŭ-uâ buōng-dā̤ sê gōng "hàng-bók-siŏh-sì" (含不蜀時), bìng-uâ sĭng-săng â̤ gōng "dŏk-iòng-găng" (突然間), dŭ ké̤ṳk Pū-tŭng-uâ siŏh-iông; Gó ô, muōi cĭk sák-muōi, bìng-uâ sĭng-săng dŭ â̤ gōng siŏh guó "chiā <strong>téng</strong> â huòi cái chiàng" (且聽下回再成), nâ mò̤ káng cê-máuk, nguāi cuŏk-dó̤i tiăng mâ̤ lì. "聽" găk Hók-ciŭ-uâ diē-sié ô 4 cṳ̄ng tĕ̤k-huák, 1) <em>tiăng</em>, cêu sê nè̤ng cêng sèu sāi gì tĕ̤k-huák; 2) <em>tiáng</em>, cuō-iéu sāi-ê̤ṳng diŏh "X-gōng-Y-tiáng" gì sṳ̀ diē-sié, chiông "chék-gōng-báik-tiáng"; 3) <em>tĭng</em>; 4) <em>téng</em>. Ciā dâ̤ 3 cṳ̄ng gâe̤ng dâ̤ 4 cṳ̄ng sṳ̆k diŏh ùng-ĭng (literary readings), cuòi cêu sê gōng, kēu-ngṳ̄ cĭng ciēu sāi dék. Nguāi iâ ô găk lā̤ siōng, ĭ cuōng-gì ng sāi nè̤ng sèu-sèu sāi-ê̤ṳng gì "tiăng", huāng dó̤ kó̤ sāi cī-māng săng-hông gì "téng" nĭ?</p><p>Buóh liēu-gāi cī piĕ ông-dà̤ gì dák-áng, nguāi sĕng dái liĕk-ôi káng gūi ciéh Ĭng-ngṳ̄ diē-sié gì cióh-sṳ̀ (loanwords). Nguāi muōng tiù 3 ciéh: "audience", "retrospect", "commence". Chiông cūng-kuāng gì sṳ̀ gó ô iā sâ̤, ĭ dŭ sê Ĭng-ngṳ̄ diŏh lĭk-sṳ̄ huák-diēng sèng-âu téng Lá-dĭng-ngṳ̄ gâe̤ng Huák-ngṳ̄ diē-sié cióh diē gì. Siā ciáng-sék ùng-ciŏng sèng-âu, nè̤ng diŏh cêng-liông sāi cūng-kuāng gì cióh-sṳ̀. Nṳ̄ kō̤-nèng â̤ gì-guái, cuōng-gì bô ng sāi Ĭng-ngṳ̄ buōng-tū gì sṳ̀ nĭ? Gâe̤ng "audience" uâng có̤ "listener", "retrospect" uâng có̤ "look back", "commence" uâng có̤ "begin" â̤ mâ̤ gá hō̤?</p><p>Gó̤-só nṳ̄: <strong>Dâng ·gó̤!</strong> Nṳ̄ nâ cūng-kuāng có̤, bĕk-nè̤ng cêu dáung nṳ̄ mò̤ só-cék, háng dék nṳ̄ sê ng tĕ̤k cṳ̆ gì hiŏng-â-lē̤, cêu â̤ káng kĭng nṳ̄. Kă̤-sié? Ĭng-ôi chiông "listener", "look back", "begin", hùng-nè̤ng dŭ â̤ gōng, tā̤-hiêng mâ̤ chók siā-cáuk nèng-lĭk. </p><p>Dāng duōng kó̤ Bàng-uâ diē-sié gái siōng siŏh siōng mìng-kiŏk, bìng-uâ, hĕ̤k-ciā sê <em>Mìng-dŭ Biék-gé</em>, nṳ̄ cêu huôi-é lāu. Báh-sáng-gă siŏh-nĭk-gáu-áng gōng gì cê gōng gì sṳ̀, diŏh ùng-hŏk ngiê-sŭk diē-sié cêu găi-dŏng cêng-liông uâng siàng có̤ bĕk ciéh gōng-huák. Cuòi cêu cṳ̆-ngṳ̄ gâe̤ng băh-uâ gì kṳ̆-biék: cṳ̆-ngṳ̄ nguòng cê̤ṳ băh-uâ, dáng-sê gèng guó băh-uâ -- Dò̤ siŏh guó Ĭng-ngṳ̄ biēu-dăk, cêu sê: <span style="color: #0000ff"><strong>Art is from but beyond life.</strong></span></p><p>Bók-guó uâ chŭi-iòng hūng-kuāng gōng, nguāi cê-gă siā Bàng-uâ ùng-ciŏng, gó diŏh cêng-liông sāi buōng-iòng gì cê sṳ̀. Ĭng nguāi gâe̤ng bĕk-nè̤ng mâ̤ siŏh-iông, nguāi báik-cèng sê siŏh ciéh ké̤ṳk Huà-ngṳ̄ sā̤-nō̤ guó gì ngâung-giāng. Nguāi buóh ó̤i gâe̤ng hiā páh-dâung gì mū-ngṳ̄ gé-é siŏh léng siŏh léng dŭ kák kī lì, gâe̤ng ĭ īng-uōng káung găk sĭng diē -- ĭng-ôi, ĭ sê nguāi dék kĭng-gói gì nó̤h. </p>
Mother Tongue
2008-01-22T18:34:07Z
gnudoyng
-
Jesus Camp
http://gnudoyng.timluo.net/post/35/198
<div align="justify"><a href="http://www.imdb.com/title/tt0486358/" target="_blank"><em><strong>Jesus Camp</strong></em></a>, Dṳ̆ng-ùng iâ huăng-ĭk siàng "Gĭ-dók Iàng" (基督營), sê siŏh buô kiák diŏh 2006 nièng gì Mī-guók diêng-īng, diē-sié gé-luŏh Mī-guók siŏh dêng Ngū-sùng-cŭng (Pentecostalism) gì gáu-dù cū-cék hâ-lêng-iàng uăk-dông, niông niāng-gŏ̤ hŏk-sĭk sĭk-ciēng séng-ngiōng, ó̤i "ôi Gĭ-dók dŏk duōng Mī-guók". Ĭ-gáuk-nè̤ng sê cĭng bō̤-siū gì séng-dù, sū sŏng-iòng gì sṳ̆-siōng sĭk-câi kák piĕng-gék: sêng-cé páh-băh gōng, ĭ-gáuk-nè̤ng sê găk lā̤ <strong><em>indoctrinate</em></strong>, ng-sê <strong><em>teach</em></strong>. Nguāi kō̤-ngì, cī dêng Ngū-sùng-cŭng gáu-dù sê còng-é ciŏng Mī-guók duōng-biéng có̤ siŏh bĭk "Céng-gáu-hăk-ék" (Caesaropapism) gì guók-gă, cêu chiông Ĭ-sṳ̆-làng guók-gă siông.</div><div align="justify"><div class="pict"><a href="http://img.verycd.com/posts/0611/post-202538-1163631351.jpg" target="_blank"><img class="pict" src="http://img.verycd.com/posts/0611/post-202538-1163631351.jpg" border="0" alt="DSC06872.jpg" hspace="5" width="160" height="246" align="left" /></a></div><p>Â̤ mâ̤ báik indoctrinate gâe̤ng teach gì chă-biék? <em>Teach</em> sê gó̤-só nṳ̄ siŏh iông dâi-gié, bêng-chiā gá nṳ̄ lī-séng sṳ̆-kō̤ gì huŏng-huák; nâ <em>indoctrinate</em> nĭ, sê gó̤-só nṳ̄ siŏh iông dâi-gié, dáng-sê nṳ̄ mâ̤-sāi că-muóng ôi-sié-nó̤h, nṳ̄ diŏh mò̤ dèu-giông ciék-sêu, cêu chiông ké̤ṳk sā̤-nō̤ siông. </p><p>Huòi ĭ-gáuk-nè̤ng ô indoctrinate<em> </em>sié-nó̤h-nó̤h ké̤ṳk niê-giāng nĭ? Nguāi éng-chiông bī-gáu chĭng gì, sê diē-sié siŏh ciéh miàng giéu lō̤ Fischer gì bùi nṳ̄-gái gá gì uâ. Ĭ duâi gáe̤: "<span style="color: #ff0000">Harry Potter ng-sê ĭng-hṳ̀ng! Ŭ-sṳ̆ sê Siông-dá̤ dék duâi gì siù-dĭk! Harry Potter nâ uăk diŏh Gô-iók sì-dô̤i tiék-ngâing â̤ ké̤ṳk chṳ̄ sī!</span>" Nguāi tiăng giéng diŏh ciā uâ, guòng sĭng dŭ chuŏ-luŏh lâ.<img src="http://www.timluo.net/js/tinymce/plugins/emotions/images/smiley-surprised.gif" border="0" alt="Surprised" title="Surprised" /> Niāng-gŏ̤ tiăng uòng iâ sê duâi tiè-mà, dāng duōng chuó dŭ mò̤ gāng káng Harry Potter ·gó̤ lāu.</p><p>Nguāi iâ sê siŏh ciéh hông-gáu ·gì. Bók-guó nguāi báik-duòng, Gĭ-dók-gáu dék kĭng-gói gì nó̤h cêu sê ĭ dó̤i ùng-huá dŏ̤-nguòng-séng (cultural diversity) gì kuăng-ṳ̀ng, Să̤-huŏng sié-gái iâ
ciáng sê ĭng diŏh cuòi ciáh dáik hók. Nâ sê gōng, Gĭ-dók-gáu â̤ tó̤i duōng gáu Dṳ̆ng-sié-gī gì bō̤-siū sì-dô̤i, nàng-gă gì ùng-mìng iâ gṳ̆ng lā̤ cà̤ kŭi dó̤-chiă ·gó̤ lāu.</p></div>
Critiques
2008-01-19T01:24:17Z
gnudoyng
-
搬厝遘租塊
http://gnudoyng.timluo.net/post/35/197
<p><span style="color: #0000ff"><strong>我罔講汝罔聽</strong></span>... Hmm, ciā miàng sê-ng-sê iā sṳ̆k? Mò̤ dâng, cŭ-uái cô sê GnuDoyng gì sĭng blog, kĕk Bàng-uâ-cê siā ùng-ciŏng gì sū-câi. </p><p>Nguāi gó-dā̤ găk YAM gâe̤ng BLOGSPOT dŭ ô ché kŭi guó mū-ngṳ̄ blog, bók-guó dŭ ké̤ṳk GFW hŭng lâi ·gó̤. Diŏh cī dó̤i mò̤ cê̤ṳ-iù gì siâ-huôi, lièng blog dŭ mò̤ dó̤i kŭi, buăng lì buăng kó̤, cĭng chiông siŏh ciéh chék-sié téng siĕh gì mò̤ chuó nè̤ng, cĭng-cĭng iā sêu-guái. Chŭi-iòng cūng-kuāng, nguāi táu-dā̤ dŭ mò̤ gĕ̤h lâi sāi mū-ngṳ̄ siā nĭk-gé gì sĭk-guáng: <strong>mū-ngṳ̄ cêu sê nguāi gì mother tongue. </strong><img src="http://www.timluo.net/js/tinymce/plugins/emotions/images/smiley-tongue-out.gif" border="0" alt="Tongue out" title="Tongue out" /> <strong>How can I taste the </strong><strong>flavors of </strong><strong>my own life with someone else's tongue?</strong></p><p>Gó-chṳ̄ nguāi giók-é, diŏh 2008 nièng gì kī-sṳ̄ tṳ̀ng kŭi nguāi gì mū-ngṳ̄ blog, gié-sṳ̆k liêng-sĭk mū-ngṳ̄ gì siā-cáuk nèng-lĭk. Tim sê nguāi hēng găng-dāng gì Dài-uăng bèng-iū. Gēng cē̤-nē̤ kī chuó nguāi cĭng ăng sĭng.</p><p>Kō̤-nèng nṳ̄ gì báuk-lāng-ké mò̤ nièng-ngài káng Bàng-uâ-cê. Mò̤ găk-siĕh, uâng <a href="http://www.mozilla.com/" target="_blank"><strong>FIREFOX</strong></a> káng cêu â̤ ciáng-siòng ·gó lāu.</p>
Others
2008-01-19T00:47:37Z
gnudoyng