我支持王千源

Tuesday, 22nd April 2008

“愛國者” cī-bŏng 真真好戲演 mâ̤ 煞,做癲犬樣式, bá-láu lā̤ 紅目睭滿世 să-gău “藏獨分子”,話故未講兩句(犬囝本底就 mâ̤ 講話)就起骹動手,拍 mâ̤ 贏就 báh 喙 gâ 儂,cī 幾工, bô 起手 gâ 王千源了。Cī 隻王千源是乍廿歲其青島諸娘囝,găk 美國留學。伊透底就無支持過“藏獨”,亦無做什乇——無罵儂無拍儂無刣儂無搶火炬,蜀滴滴 ngài-代都無做,就是徛着兩爿示威者臺中講道理。按癲犬邏輯:底儂共汝講 băh-pé 道理?汝伓共儂家徛蜀堆 gâ 儂伓是?會使!儂家就 gâ 汝!Gâ 死着有!……癲犬 gâ 儂罔在伊去,俗語話講:“下渡尾迎神,好看在後(Â-dô-muōi ngiàng-sìng, hō̤ káng câi hâiu)”——我死都想 mâ̤ 遘,連 CCTV 縂款正式其官方媒體都會攖 lā̤ 跳出來號伊做“dék 驚儂留學生(最醜陋留學生)。王千源會生的 ngài?我 chuŏng 手摸自家面:鼻大牙 sè̤,可疑自家是伓是已經破相了……

哈哈,我講-pă ^^,其實我卜噯共癲犬講:我見覺王千源生的野好!伓啻生的俊,伊簡直就是我見過 dék 作佳其諸娘囝!!奚勢縂款講呢?因爲伊有膽大聲講出自家其想法,共大部分儂 mâ̤ 蜀樣其想法。噲就是儂其自由,dék 欽貴亦 dék 根本其自由,勇敢表達自家愛共恨其自由。試問蜀句,天下人間故有什乇乇會比喝出儂家愛共恨其權利故重要?汝連愛恨都無敢表達,講什名國家主權?領土完整?犬吠(Kēng bôi)!!!

我看癲犬演戯,mâ̤ 載講是好笑,會載講是悲哀,替我祖國悲哀。不過蜀想遘我祖國故有像王千源縂款其好囝伲,烏暗其天乞伊蜀粒星照真光,我仈傳,中國希望故 lā̤ 有。