22.04.08

我支持王千源

Posted in Politics | 01:55

“愛國者” cī-bŏng 真真好戲演 mâ̤ 煞,做癲犬樣式, bá-láu lā̤ 紅目睭滿世 să-gău “藏獨分子”,話故未講兩句(犬囝本底就 mâ̤ 講話)就起骹動手,拍 mâ̤ 贏就 báh 喙 gâ 儂,cī 幾工, bô 起手 gâ 王千源了。Cī 隻王千源是乍廿歲其青島諸娘囝,găk 美國留學。伊透底就無支持過“藏獨”,亦無做什乇——無罵儂無拍儂無刣儂無搶火炬,蜀滴滴 ngài-代都無做,就是徛着兩爿示威者臺中講道理。按癲犬邏輯:底儂共汝講 băh-pé 道理?汝伓共儂家徛蜀堆 gâ 儂伓是?會使!儂家就 gâ 汝!Gâ 死着有!……癲犬 gâ 儂罔在伊去,俗語話講:“下渡尾迎神,好看在後(Â-dô-muōi ngiàng-sìng, hō̤ káng câi hâiu)”——我死都想 mâ̤ 遘,連 CCTV 縂款正式其官方媒體都會攖 lā̤ 跳出來號伊做“dék 驚儂留學生(最醜陋留學生)。王千源會生的 ngài?我 chuŏng 手摸自家面:鼻大牙 sè̤,可疑自家是伓是已經破相了……

哈哈,我講-pă ^^,其實我卜噯共癲犬講:我見覺王千源生的野好!伓啻生的俊,伊簡直就是我見過 dék 作佳其諸娘囝!!奚勢縂款講呢?因爲伊有膽大聲講出自家其想法,共大部分儂 mâ̤ 蜀樣其想法。噲就是儂其自由,dék 欽貴亦 dék 根本其自由,勇敢表達自家愛共恨其自由。試問蜀句,天下人間故有什乇乇會比喝出儂家愛共恨其權利故重要?汝連愛恨都無敢表達,講什名國家主權?領土完整?犬吠(Kēng bôi)!!!

我看癲犬演戯,mâ̤ 載講是好笑,會載講是悲哀,替我祖國悲哀。不過蜀想遘我祖國故有像王千源縂款其好囝伲,烏暗其天乞伊蜀粒星照真光,我仈傳,中國希望故 lā̤ 有。

Print View

19.03.08

請填藏儂自由

Posted in Politics | 18:23

我仈傳自由對 giĕng-dṳ̆k 儂其意義。儂其自由,是該當勢攖國家利益懸頂邊……

Cī-bŏng diŏh Să̤-câung huák-sĕng gì dâi-gié, gāng-dĭk cêu sê 89 nièng Lĕ̤k-sé Sê̤ṳ-giông gì tṳ̀ng-sĭng siông-iēng. Dṳ̆ng-gê̤ṳng kĕk ū-lĭk ngâing áik giâ Să̤-câung hù-siông gì káung-ngiê. Gé̤ṳ bó̤-dô̤, ī-gĭng ô gūi-sĕk ciéh nè̤ng ké̤ṳk tài sī, báh-siông nè̤ng sêu siŏng. Hiêng-káik-sì, céng-hū ī-gĭng gâe̤ng Să̤-câung hŭng-sō̤ lâi ·gó̤, pái buô-dôi bā-siū, mâ̤ kīng gé-ciā iù-káh diē. Páh ché̤ṳng siăng, tiè-mà siăng, gáe̤-géu siăng; háik, gâng gâe̤ng mĕk-cāi... Cuòi cêu sê Să̤-câung, găk Dṳ̆ng-gê̤ṳng tūng-dê â-dā̤ cĭng-sĭk gì Să̤-câung...

Ká̤-sié Să̤-câung-nè̤ng â̤ siōng giàng gáu gă̤-dŏng huāng-káung Dṳ̆ng-gê̤ṳng? (Gì-sĭk cuòi dŭ sê ĭng-ôi Dṳ̆ng-gê̤ṳng giĕ-nièng-màng buóh bâing Ó̤-ông, dăng cêu găk Să̤-câung gì sê-miêu diē-sié kŭi-diēng "ái-guók gáu-ṳ̆k", âing-cié hù-siông gì cŭng-gáu uăk-dông, gó-chṳ̄.) Muōi siŏh huòi Să̤-câung huák-sĕng cūng-kuāng dâi-gié, Dṳ̆ng-gê̤ṳng diâng-diŏh â̤ lâi Dăk-lâi Lăk-mà. Nàng-gă guó-éu siōng lâ cêu â̤-báik cuòi sê iā-gōng lāu: Dăk-lâi Lăk-mà liù-uòng găk nguôi-guók, ĭng-ôi Dṳ̆ng-guók sĭng-ùng hŭng-sō̤, Să̤-câung nô̤i-buô cêng sâ̤ dâi-gié ĭ dŭ mâ̤ hiēu, dăng cuōng â̤ gâe̤ng ĭ "Dăk-lâi Lăk-mà Cĭk-tuàng" ô gáng-guó?

Nguāi buōng-sĭng ng sê Câung-cŭk, nguāi táu-dā̤ muôi kó̤ guó Să̤-câung, dó̤i huāi-nē̤ iâ mò̤ sié-nó̤h éng-chiông. Dáng-sê, nguāi báik-duòng cê̤ṳ-iù dó̤i giĕng-dṳ̆k nè̤ng gì é-ngiê. Nè̤ng gì cê̤ṳ-iù, sê găi-dŏng-sié ĕng guók-gă lê-iéh gà̤-dēng-bĕng. Buáng sié-gī sèng nàng-gă dŏk kó̤ Câung-nè̤ng gì cê̤ṳ-iù, găi-dŏng dèng ké̤ṳk ĭ-gáuk-nè̤ng, cuòi cêu sê nguāi gì siōng-huák.

Dṳ̆ng-guók ā, nguāi gì Cū-guók, cī bĭk chṳ̆ng-muāng cô̤i-kiĕng gì guók-gă. Nguāi â̤-sāi dò̤ sié-nó̤h lì cīng-géu nṳ̄? Nguāi tō̤ mâ̤ diŏh dák-áng. Cuō ā, Nṳ̄ buóh-ó̤i cuōng ăng-bà̤ nàng-gă Dṳ̆ng-huà Mìng-cŭk gì ê-lài nĭ? Găk cŭ-uái, hióng siông nguāi dék gièng-sĭng gì gì-dō̤.

Print View